Планинарскиот клуб „Љуботен“ годинава го организира 44. традиционално искачување на Титов Врв. Овој настан е еден од најпрепознатливите и најмасовни помеѓу планинарската заедница во Македонија. Настанот се одржува во година кога клубот одбележува јубилеј имено, 101 година од своето основање. Планинарскиот клуб „Љуботен“ со своите активности и настани, успева да ги поттикне младите на здрави животни навики и да им ја вгради љубовта кон природата.
Ова искачување претставува вистински празник за нашиот клуб и за целата планинарска заедница. Подготовките започнуваат уште неколку месеци однапред, со многу ентузијазам, посветеност и тимска работа, за секој детал да биде добро организиран. Настанот ги собира планинарите од Македонија, Балканот и пошироко. Денес, ова е еден од најголемите и најпрепознатливите планинарски настани во државата, зад кој стои огромен труд, љубов кон планината и почит кон традицијата, вели Христина Коруноска, член на извршниот одбор на ПК Љуботен.
Фото: ПК Љуботен
Освен „празник“ за планинарите, настанот има и доза на свеченост бидејќи ја одбележува вековната традиција на најстариот планинарски клуб во Македонија.
Планинарскиот клуб „Љуботен“ е најстариот активен планинарски клуб во Македонија и претставува симбол на една вековна традиција која се пренесува од генерација на генерација. Во текот на своето постоење клубот поминал низ различни периоди, на подеми и предизвици, но секогаш останал верен на својата мисија и љубовта кон планината.
На настанот се очекува присуство на повеќе од 500 учесници, а бројката наведуваат од ПК Љуботен во голема мера зависи и од временските услови. Иако официјалното пријавување трае до 26 мај, традиционално голем број учесници се пријавуваат и непосредно пред самиот настан.
Покрај планинари од цела Македонија, очекуваме гости и од повеќе земји од регионот, како Србија, Косово, Бугарија, Албанија и Црна Гора и други, што дополнително му дава меѓународен карактер на настанот, додава Коруноска.
Конкретно искачувањето на „Титов врв“ е традиција која се негува со децении и има за цел да ја поттикне солидарноста на планинарите и почитта кон планината.
Чувството кога ќе се видат стотици луѓе собрани со иста цел и љубов кон природата е навистина посебно и претставува најголема награда за целиот вложен труд околу организацијата, сведочи Коруноска.
Фото: ПК Љуботен
Младите се враќаат кон природата
Денешниот брз начин на живот и времето поминато пред екраните прават младите сè повеќе да чувствуваат потреба да побегнат од секојдневието и барем на кратко да престојуваат на планина, вели Коруноска.
Според неа планината нуди мир, слобода и чувство на исполнетост кое тешко може да се најде на друго место. И покрај физичкиот напор, човек се враќа одморен и со наполнети „батерии“. Токму тоа чувство е една од најголемите мотивации за младите да се приклучуваат на вакви активности.
Во последните неколку години се забележува позитивен раст на интересот кај младите за планинарење и активности во природа, сведочат искуствата на планинарите од ПК Љуботен.
По еден период на стагнација, сега сè повеќе млади луѓе сакаат активно да го поминуваат слободното време на планина. Ние како клуб постојано работиме на тоа да ги мотивираме и најмладите уште од мали нозе да ја засакаат природата, преку организирање акции, младински кампови, едукативни активности и обуки, заклучува Христина Коруноска.
Фото: ПК Љуботен
Расте интересот кај почетници кои годинава за првпат ќе го искачуваат „Титов врв“
Најголемиот предизвик секоја година се временските услови, бидејќи тоа е единственото нешто што не може да се предвиди или контролира, велат од ПК Љуботен. Безбедноста на учесниците е загарантирана бидејќи турата вдолж патеката има медицински тим и пунктови за прва помош, а водичите постојано се грижат за движењето и безбедноста на колоната.
За оние кои првпат ќе се искачуваат на Титов Врв, најважно е да дојдат со соодветна планинарска опрема – планинарски чевли, јакна, капа и ракавици, бидејќи временските услови на планина можат брзо да се променат. Исто така, важно е да се почитуваат насоките и одлуките на водичите, со цел турата да помине безбедно и успешно, додаваат од организацијата.
Титов Врв за мене лично претставува една од најзначајните тури, бидејќи токму со ова искачување пред 10 години започна мојата приказна со планинарењето и љубовта кон планината. Затоа, секое наредно искачување за мене носи посебна емоција и има огромно значење, вели Коруноска.
Таа додава дека Титов Врв го доживува како симбол на традиција, истрајност и љубов кон планината. Таму не се искачуваат само планинари, туку луѓе кои ја делат истата страст и почит кон природата.
Фото: ПК Љуботен
Настан за подигање на јавната свест за значењето на чиста и здрава животна средина
Постојано апелираме до сите учесници да ја почитуваат планината, да не оставаат отпад зад себе и да се однесуваат одговорно кон животната средина. Наша обврска е да ја чуваме и зачуваме за идните генерации, вели Коруноска.
Во склоп на настанот во сабота организаторите подготвуваат и акција за чистење на Попова Шапка. Оваа активност традиционално ја спроведува ПК Љуботен.
Преку оваа инициијатива сакаме да испратиме силна порака до сите посетители, планинари и млади луѓе дека вистинската љубов кон планината не се покажува само со искачување, туку и со грижа, почит и одговорност кон природата, додава Коруноска.
Фото: ПК Љуботен
Планинарските домови се слаба точка на нашата држава
За состојбата со планинарските домови често се говори во јавноста, а планинарите и планинарските клубови реагираат дека планинарските домови често се со лоша инфраструктура, долги години не се вложува во нив или дека голем дел од нив се целосно затворени и надвор од функција. Коруноска вели дека во последните години има напредок, но сепак потребни се уште многу вложувања во планинарската инфраструктура, мал дел од планинарските домови функционираат и се одржуваат со огромен ентузијазам од клубовите, односно од нивните членови.
За жал, во Македонија има доста објекти на кои им е потребна реконструкција и поголема поддршка. Истото се однесува и за планинските патеки. Важно е да се работи на подобро уредување и одржување на планинските патеки, со цел планините да бидат побезбедни и подостапни за сите љубители на природата, заклучува таа.
ПК Љуботен ќе продолжи да работи на развој на планинарството
Целта на ПК Љуботен е и понатаму да работи на развојот на планинарството, организација на квалитетни планинарски тури, едукации, младински кампови и обуки за безбедно движење во планина. Како најстар планинарски клуб во Македонија, важноста за негово одржување и актуелизирање е голема во поглед на афирмацијата на планинарењето, велат од организацијата.
Во последните години посебен фокус е ставен на младите кои преку дружење, спорт и престој во природа ги запознаваат вистинските вредности што ги носи планината. Исто така, од ПК Љуботен најавуваат дека ќе продолжат да работат на промоција и заштита на Шар Планина и развој на планинарската култура во целата држава.
Разговорот го водеше: Магдалена Стојмановиќ – Константинов